Halal-haram məsələsinin istehlakçıdan daha çox istehsalçıya, tələb
edəndən daha çox təklif edənə aid olduğunu insanlar bilməlidir artıq.
Halal kəliməsi o qədər deformasiyaya uğrayıb ki, məna tamamilə yoxa
çıxıb yerini kiçik mənasız şərtlər və rituallar tutub. Halal mənaca
heyvanın başının hansısa istiqamətə, hansısa sözlərlə kəsilməsi deyil.
Və halallıq təkcə ətlə, ətin kəsilmə qaydaları ilə limitlənmir. Hətta
deyərdim kəsilmə məsələsi ən sonuncu düşünüləsi prosesdir. Təklif
etdiyimiz hər bir mal, hər bir xidmət mütləq halal-haram süzgəcindən
keçir.
Məndən halal kəliməsinin həqiqi anlamına dair
soruşsalar onlara bu cümləni deyərdim - Özünə rəva bilmədiyini başqasına
rəva bilmə. Məhsulun halal olması üçün, istehsalçının onu öz
balalarının istifadəsinə yararlı şəkildə istehsal etməsi əsas şərtdir.
Yəni bir qoyunu, toyuğu pis böyüdür, heyvanlara zülm edir, genini
dəyişir, iynə ilə çəkisini artırırsansa bu artıq halallıqdan çıxmış
olur. Bu əti sonra istəsən məscidin həyətində kəs, ya nəzir de kəs, ya
da quranı başdan ayağa oxu sonra kəs, xeyri yoxdur. İşin içinə əməldə
haram qatdınsa onu hansısa istiqamət və ya sözlər halal edən deyil.
Mənə görə İslamda olan halal sözü xaricilərdə "faretrade" sözünün
daha gözəl və daha zəngin formasıdır. Təklif etdiyin hər bir məhsulun
arxa planı, istehsal yolu təmiz olmalıdır ki, bu məhsul islam "dili" ilə
desək halal olsun. Sənin əlində ferma təsərrüfatı varsa, işçilərin
haqqını vaxtında və yüksək səviyyədə ödəməkdən tutmuş, ətraf mühitin
qorunmasına kimi, heyvanlarla rəftara kimi hər şey məhsulunun halal və
ya haram olmasına təsir edir.
Quranda "görülən işlərin Allah
adına edilməsi" əmr olunur. Bunu ucuzlaşdırıb Allah kəliməsini
işlətməklə etdiyimiz (və ya kəsdiyimiz) halal olur iddiasında olmaq,
İslama və Qurana hörmətsizlikdən başqa bir şey deyil. Yəni bu
ümumiyyətlə məsuliyyətsizlik və ciddiyətsizlikdir. Allahın adı ilə iş
görmək, o işi Allahlı (vicdanla) yerinə yetirmək deməkdir. Allah adına
iş görmək, qəlbində Allahı şahid tutub məhsulunun gözəl, zərərsiz,
düzgün şərait və şərtlərdə, heç kəsin haqqını yemədən ərsəyə
gətirildiyinə inanmaq və güvənmək deməkdir.
p.s - Faretrade
kasıb ölkələrdə əhalinin (təsərrüfatla məşğul olan fermerlərin, həmçinin
işçilərin) əkib-becərdiyini dürüst qiymətlə almaq, onlarla düzgün
ticarət etmək deməkdir.
Cavid Şirinov
No comments :
Post a Comment